PRESENTACIÓN ARMADIÑA ROCK 2019
Dubioza Kolektiv, Heredeiros da Crus e Triángulo de Amor Bizarro encabezan o cartaz da XI ARMADIÑA ROCK ESTRELLA GALICIA o cal se celebra do 22 ao 25 de agosto en Combarro.
Combarro 16 de agosto do 2019. Hoxe presentouse a undécima edición do FESTIVAL ARMADIÑA ROCK ESTRELLA GALICIA na praza da Rualeira de Combarro, o festexo celebrarase do 22 ao 25 de agosto. Á presentación asistiron: os representantes de Armadiña Xosé Rial, Víctor Muñiz, Diego Castro e Miguel Fontán,os concelleiros de Poio Gregorio Agís, Silvia Díaz e Chelo Besada, os deputados provinciais Santos Hector e Victoria Alonso e o Alcalde de Poio Luciano Sobral.
Comezou o acto coa intervención do Vicepresidente da ACDeM Armadiña, Xosé Rial. O directivo agradeceu os apoios do Concello de Poio e a Deputación de Pontevedra. Así como tamén os patrocinadores privados, destacando a Estrella Galicia, empresa que leva catro anos apostado polo Armadiña Rock, Johnny Walker e o empresariado local o cal vólcase un ano máis coa celebración do festival.
Rial indicou que “o Armadiña Rock é un festival artesán, feito por persoas que ocupan parte do seu tempo libre en organizalo, agradeceu o traballo de moitos voluntarios que fan posíbel presentar hoxe o cartaz e posibilitan que o Armadiña Rock sexa unha gran festa”.
“Tras once anos o festival aínda trae novidades” destacou o membro da Armadiña. Entre elas destaca que por primeira vez haberá pregoeiro do festival, trátase do artista compostelán Xosé Constenla, o cal ten ligazóns familiares na vila mariñeira e “sabíamos que lle faría moita ilusión, é coñecedor do traballo que fai este colectivo, é sabedor da pequena revolta que o proxecto Armadiña fixo en Combarro. Armadiña partilla con Constela a música, a defensa da cultura do País e do patrimonio. É o mellor candidato posíbel” . O seu pregón será o xoves 22 ás 20:00.
O Festival tamén traerá actuacións de “Circo na Chousa”, un Armadiña Kids onde incorporamos a cultura urbana – skate e graffiti- , conferencias onde trataremos temas coma a música e a mensaxe revolucionaria e compartiremos coloquio con outros colectivos galegos que fan festivais como o noso.
Sumaremos a IV edición ao Concurso de decoración mariñeira para engalanar Combarro. Mais este ano cunha novidade, ábrese o concurso a todo o casco histórico, para que todas as vivendas podan engalanarse e que os negocios adecenten as súas terrazas para que toda a vila celebre a Festa do Mar. “Agradecemos a colaboración dos colectivos locais Mare Podium, A Reiboa e A Solaina os cales participarán coma o xurado que escollerá a mellor decoración” apuntou Rial.
Xa centrado nas bandas do festival, o representante de Armadiña Rock mostrou a súa ledicia de contar cun cartaz completo e con bandas de moito recoñecemento. En total serán vintedúas bandas as que participarán no Festival, vinte das cales son bandas galegas e catro son bandas de Poio. O cartaz estará encabezado por Dubioza Kolektiv, Heredeiros da Crus e Triángulo de Amor Bizarro entre outras. Tamén destacou que por primeira vez participaran un grupo pertencente a propia asociación: As pandeireteiras de Armadiña.
Os bosnios de Dubioza Kolektiv basean a súa música nas súas raíces, mesturando o folclore da súa terra co rock, reggae ou hip-hop. É a gran aposta para esta edición, a banda balcánica é moi coñecida en toda Europa e é un dos pratos fortes deste ano.
Heredeiros da Crus volven a Combarro. Rial destacou que os de Ribeira “son unha referencia do rock galego, é unha das bandas máis solicitadas pola nosa veciñanza e unha aposta segura para un festival”.
Triángulo de Amor Bizarro é unha das bandas máis importantes do indie estatal. Os de Boiro mesturan un son achegado ao punk-rock con melodías pop. “Son unha das apostas desta edición” así reflectiu o representante do Festival .
No cartaz tamén destacan referencias do hip-hop en galego coma Dios Ke Te Crew, bandas tan importantes como Familia Caamagno, Nao, Bastards on Parade, Balkan Bomba ou músicos emerxentes coma son High Paw e Los Jinetes del Trópico.
As sesións vermús realizanse na praza da Rualeira de Combarro e contarán con Falperrys e Ukestra do medio. Haberá por primeira vez unha zona lounge para amenizar a tarde da man de Beti de la Church. Na sesión de tarde, a cal rebautizamos coma sesión fresca, estará The Testas’Van e Sote. Brassica Rapa, Os Queimatasas, Pinguela Terra de Montes, Banda do Patio, Pandeireteiras de Ronsel e Armadiña serán as encargadas de levar a música por todo Combarro. “Na nosa vila vai haber música en todos os recunchos na fin de semana do Festival” acredita Rial .
“Hoxe presentamos unha fin de semana chea de música, só nos queda animar a xente a que veña a Combarro, a gozar dunha gran verbena, dun festival cheo de música galega, a unha festa que é de balde” rematou o representante do Armadiña Rock.
Deseguido falou a deputada Victoria Alonso, a cal comezou a súa intervención felicitando a asociación Armadiña polo “inmenso traballo realizado, non só polo festival Armadiña Rock, se non tamén polo festival de Curtas”.
A deputada indicou que “O Armadiña Rock ten lugar nunha contorna marabillosa como Combarro e conta con todos os ingredientes para ser unha cita musical de referencia”.
Indicou que “as administracións temos que estar o lado das asociación que traballan por consolidar as citas culturais e porque as tradicións perduren”. Rematou a súa intervención “felicitando a organización polo gran traballo e as once edicións que leva o Festival”
Rematou as intervencións o Alcalde de Poio Luciano Sobral. Celebrou unha nova edición do festival e lembrou os comezos. Mostrou a súa satisfacción polo crecemento do Armadiña Rock e recoñeceu “o gran traballo da asociación Armadiña na parroquia Combarro”.
O alcalde lembrou a importancia que ten o Armadiña Rock “sendo un festival de referencia no País”. Ademais centrou a súa intervención destacando a presenza de grupos tan importantes como Heredeiros da Crus, dos cal lembrou as súas actuacións anteriores en Poio.
Sobral rematou animando a asistencia ao festival, pronosticou unha gran afluencia de público coma en anos anteriores e rematou animando a xente a “pasalo ben e coidar desta marabillosa contorna”.
- admin
- 0 Comments
- Novas
Enviar comentario * Enderezo de e-mail non publicado. Os campos obrigatorios estan marcados con *