Xosé Constenla

Xosé Constenla é un cantautor galego que naceu en Santiago. A súa infancia transcorreu polos territorios da capital galega, Coruña e Combarro, vila coa que segue mantendo un vínculo fondo.
Introduciuse no eido da música alá polos anos 90 da man de Silvio Rodríguez e Luis Eduardo Aute. As primeiras cancións da adolescencia, época na que comezou a dar concertos, deron paso a novas influencias e concertos na Compostela universitaria. Participou das protestas ‘Non á LOU’, ‘Nunca Máis’ ou ‘Non á Guerra’; así, seu primeiro disco, Quen fixo berrar o silencio (2004), estivo moi marcado polo loita social. A partir dese primeiro traballo, a súa proxección amplíase ao ámbito estatal e publica os traballos Olladas dun entusiasta (2008), Sinecismo (2013) ou Virada por avante (2016). No seu estilo converxen o jazz, o country, o blues, o soul ou o folk-rock americano.
Alén de todo isto, Xosé Constenla cultiva un compromiso coa palabra, coas historias cotiás, co patrimonio e coa antropoloxía de noso. Por todo iso, ademais de ofrecernos a súa música, será o pregoeiro oficial do Armadiña Rock 2019.